នាយករដ្ឋមន្ត្រីសរសេរលិខិតរំលែកទុក្ខដោយផ្ទាល់ដៃជូនចំពោះគ្រួសារអតីតប្រធានាធិបតីចិន លោក ជាំង ជីមីន
ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានសរសេរលិខិតរំលែកទុកដោយផ្តាល់ដៃជូនចំពោះក្រុមគ្រួសារលោកអតីតប្រធានាធិបតីចិន ជាំង ជីមីន និងបានរម្លឹកពីប្រវត្តិនៃការធ្វើទស្សនកិច្ចរបស់លោកមកកម្ពុជាដែលបានលើកកម្ពស់ទំនាក់ទំនងប្រទេសកម្ពុជា-ចិនដល់ពេលបច្ចុប្បន្ន។
ក្នុងសារលិខិតរម្លែកទុកចុះថ្ងៃទី៥ ខែធ្នូ ឆ្នាំ២០២២ សម្ដេចតេជោ ហ៊ុន សែន បានបង្ហាញសេចក្តីទុក្ខសោកយ៉ាងក្រៀមក្រំ ក្រោយពីទទួលដំណឹងមរណភាពរបស់លោក ជាំង ជីមីន។
សម្ដេចតេជោ បានបន្ថែមថាមរណភាពរបស់លោក ជាំង ជីមីន គឺជាការបាត់បង់ដ៏ធំធេងនូវរដ្ឋបុរសដ៏អស្ចារ្យ របស់ចិន ដែលបានលះបង់ពេលវេលាពេញមួយជីវិតរបស់លោក ដើម្បីលើកកម្ពស់ជីវភាពរស់នៅរបស់ប្រជាជនចិន និងវិបុលភាពនៃប្រទេសចិន។
សម្ដេចថា៖ «ឯកឧត្តម ជាំង ជីមីន ក៏ជាមិត្តដ៏ល្អរបស់កម្ពុជាផងដែរ។ ទស្សនកិច្ចផ្លូវការនៅកម្ពុជា នាឆ្នាំ២០០០ របស់ឯកឧត្តមបានផ្ដល់សារៈសំខាន់ជាប្រវត្តិសាស្ត្រ ក្នុងការលើកកម្ពស់ទំនាក់ទំនង និងកិច្ចសហប្រតិបត្តិការកម្ពុជា-ចិន»។
គួរឱ្យដឹងផងដែរថា អតីតប្រធានាធិបតីចិន លោក ជាំង ជីមីន ដែលកាន់អំណាចពីឆ្នាំ១៩៩៣ ដល់ឆ្នាំ២០០៣ បានទទួលមរណភាពនៅថ្ងៃទី៣០ ខែវិច្ឆិកា ឆ្នាំ២០២២ ក្នុងអាយុ ៩៦ឆ្នាំ។ យោងតាមការចុះផ្សាយរបស់សារព័ត៌មានស៊ីនហួ លោក Jiang បានទទួលមរណភាពដោយសារជំងឺមហារីកឈាម និងខ្សោយសរីរាង្គជាច្រើន៕